女子世青盃B組第2輪，法國女足U20火併巴西女足U20。法國女足U20首輪只能同加拿大女足U20踢成3比3，反映後防並唔穩陣，巴西女足U20首輪則以9比0大勝斐濟女足U20，盡展霸氣，加上巴西女足U20近6場全勝，氣勢如虹，客勝睇高一線。（周三早上6時開賽）

法國防線鬆散靠唔住
法國女足U20過往均屬4強分子，不過上屆未能打入4強，實力似有倒退迹象，不宜高估。B組首輪賽事所見，她們對加拿大女足U20，開賽4分鐘便失守，半場落後1比2，雖然下半場把握對方防線漏洞一度反超前3比2，但佢哋後防太過鬆散，完場前被對方追和3比3完場，錯失贏波機會，今場要對同組最強嘅巴西女足U20，肯定難打。

作為「足球王國」，巴西女足U20係4強常客，包括上屆獲得季軍，森巴女足近況亦相當出色，包括早前在巴黎奧運女足打入決賽，最後獲得銀牌，對巴西女足U20起到激勵作用。佢哋喺B組首輪展示王者風範，以9比0大勝斐濟女足U20開靚個頭，對球隊爭取佳績大有幫助，今場乘勝追擊法國女足U20，連捷可期。